Qadinkimi.com oxucumuz Ülviyyə Lalənin şeirlərini təqdim edir.

***
Qadın peyğəmbər yoxdur deyib
Xor görürlər qadını
Qadının bətnindən çıxıb,
döşündən süd əmənlər.
Yüz iyirmi dörd min peyğəmbər içində yoxdur qadın
Yoxdur sənin adın.
Yüz iyirmi dörd min içində bilmirlər beşinin adın.
Tanımırlar qadın peyğəmbər Səccahı.
Tanıdanda deyirlər o yalançı peyğəmbər
Heç adını bilmədikləri
yüz iyirmi dörd min kişini deyirlər gerçək peyğəmbər.

***
Əsrlər boyu
şəninə tərif deyib,
mədh ediblər
əndamını, yerişini, duruşunu
əsir etdikləri qadının...
Şirin söz nəyə gərək
azad deyilsə qadın.
Xəyalı göylərdədir,
vücudu yanında olsa,
nə fayda.

***
Səni nə Leyli kimi, nə Əsli, nə Cülyetta kimi sevirəm.
Səni Hüqonun "Gülən adam"nın Deası kimi sevirəm,
Kor-koranə...
Dünyada sadəcə sən varmışsan kimi,
Başqalarını görmürəm,
Sadəcə səni hiss edir, səni görürəm.
Səni nağıllarda ağ atlı şahzadə gözləyən qız kimi yox,
Özüm kimi, özüməməxsus sevirəm

***
Gecə saat on bir
Evi təmizləyib,
paltarları ütüləyib
İstədim oxuyum roman
Sabah nə bişirəcəm fikri
İşğal etdi beynimi.

***
Səni Hüqonun Səfilləri,
Hessenin Yalquzağı,
Voyniçin Ovodu
Mirzə Şəfinin nəğmələri qədər sevirəm.
Sənə haqsızlıq edənlərə
Hipatiyanı daşlayan,
Quju edam edən,
Emili dü Şatleni xor görən kütlə qədər nifrət edirəm.
Sənə Mariya Kürinin, Sofiya Kovalevskayanın, Emmi Noterin, Lise Maytnerin elmə olan heyranlığı kimi
heyranam.
Səni Şükriyyənin, əlcəzairli Cəmilənin qətiyyəti ilə sevirəm.
Zalım şahı şeirləri ilə ifşa edib, dodaqları tikilən Fərrux Yəzdi dürüstlüyü ilə sevirəm səni.
Qadın ehtirasını çılpaqlığı ilə yazan, bakirə rahibə bingenli Hildegard çılğınlığı ilə sevirəm səni.
Səni incidənlərə qarşı Seyyida al-Hurra, Xeyzuran sultan kimi zalımam.
Sənə olan sevgimdə gilyotinə gedən Olimpiya De Quj kimi cəsarətliyəm.
Sənə olan sevgimdən qadın peyğəmbər Seccah kimi peyğəmbərliyimi elan edib, sevgi dini yaymaq
istəyirəm yer kürəsinə.

***
Xoşbəxtlik
Pencəyimin cibindən
tapdığım manatda
İydə ağacında babamın qurduğu yelləncəkdə,
Nənəmin kürəyində
Anamın qucağında,
Naşı sevgimdə
Bir də 25 yaşdan sonra
oxuduğum kitablardaydı.

***
Bütün qadınları əzizləmək istəyirəm
analar körpəsinə oxşama deyib
əzizlədiyi kimi.
Bütün qadınlara layla demək istəyirəm
körpə uşaq kimi
şirin-şirin yata bilmələri,
dərd-səri bir neçə saatlıq
ata bilmələri üçün.
Qadın olmağın xor görüldüyü
dünyada
Bütün qadınlara görə
ağlamaq istəyirəm
Anam-nənəm yasda
Ağı deyib ağladığı kimi.
Bütün qadınlara
nağıl danışmaq istəyirəm.
Divə qalib gələn ağıllı Cırtdanın nağılın.

***
Əvvəl-axır öləcəyini bilə-bilə
üç il, beş il, on beş il
uzatmaq istəyir ömrünü insan.
Öləcəyini bilə-bilə
övlad gətirir
əzablı dünyaya —
özündən bir hissə
yaşatmaq üçün
təsəlli axtarır.
Ölüm dəhşəti sarsıdır onu...
İnandırır özünü
öləndən sonra yaşayacağına.
Uydurur özündən əbədi həyat...
Ümid edir, yaşayır,
yaşadır…

***
Atası onları qoyub
soyuq iqlimlərə gedəndən,
Sevgilisi qonşudakı rus qızını sevəndən
Gözünü maviyə,
Saçını sarıya boyadı qadın.

***
Sağ ikən öpmədikləri,
Sarılmadıqları adamın
Məzar daşın öpürlər.
Sağ ikən ad günü keçirməmiş,
Unudulmuş adama
ad günü keçirib,
ildönümününə yığışırlar.
Yoxluğuna ağlayırlar
Sağ ikən varlığını görmədikləri adamın.
Sağ ikən beş manat qıymadıqları adamın məzarına
Yüz manatlıq əklil aparırlar —
Vicdanlarını rahatlatmaq üçün.
Yenə də onu yox,
Özlərini düşünürlər —
Axşam rahat yatmaq üçün,
Vicdan yükünü atmaq üçün.

Müəllif: Ülviyyə Lalə

Qadinkimi.com